Sabèm que uèi, de mai en mai avançam cap a una societat digitalizada e lo mond de la cultura es fòrça impactat per aquela evolucion. Quitament se, suls malhums socials, i a d’« influençaires » que porgisson de contenguts interessants, l’accès a la cultura fisica demòra pasmens indispensable per comprene lo mond qu’ocupam. Es per aquò que de dispositius tales coma las jornadas del patrimòni son necites. Coma cada annada, se debanan la tresèna dimenjada de setembre. E avèm d’astre en Occitània perque ne mancam pas de patrimòni ! Plan segur, avèm de castèls, de ponts, de vilatges medievals mas tanben avèm la lenga nòstra. La lenga d’òc s’inscriu dins çò que se sona lo PCI o lo Patrimòni Cultural Immaterial. Autrament dich, es un ensemble de praticas socialas, de representacions, de coneissenças que fan partida del patrimòni cultural d’una comunautat. A Besièrs, se trapa un endrech particularament propici a la difusion de la lenga occitana e de sa cultura qu’es lo CIRDÒC. Es doncas amb tota naturalitat que las jornadas del patrimòni se faguèron en òc ! Mas patrimòni rima pas automaticament amb ancian, la pròba n’es qu’ongan, la tematica elegida per las JDP son las femnas dins l’occitan e lo feminisme. Doas activitats èran previstas, una lo matin qu’èra la creacion d’un fanzine [contraccion de fanatic e magazine en anglès, es un diari liure] per Laurí Privat e Magdalena Maire. Foguèt un crane moment ont cadun poguèt s’exprimir liurament sus de subjèctes coma lo feminisme, lo colonialisme interior o encara la perennitat de la lenga occitana. La segonda activitat se debanèt la tantossada. Èra una taula redonda consacrada a dos obratges literaris : Sul camin del feminisme de Maud Seguièr e Femmes rebelles d’Oc de Rose Blin-Mioch. Totas doas faguèron una presentacion prigonda del contengut de lor libre. Lo primièr aborda lo concèpte del feminisme jos totas sas formas, lo definís e balha d’aisinas per endralhar cap a una societat mai egalitària. Lo segond seguís las piadas de las femnas occitanas que foguèron pionièras dins lor encaminament e que gausèron trencar las reglas de lor epòca. Per acabar, lo responsable dels archius, Matiàs, menèt una discutida a l’entorn del sicut del feminisme e los mejans de far avançar la causa. Foguèt un moment ric d’escambis entre las autoras e lo public. E vist que lo CIRDÒC es tanben un centre cultural que conserva d’archius, avèm acabat aquesta polida jornada amb una mòstra dedicada a las femnas, de segur !
Manon Combet amb l’ajuda d’Annia Pla
